12 mars 1968-12 mars 2018. L'île fête dans quelques jours les 50 ans de son indépendance. Un fidèle lecteur nous a fait parvenir un poème qu'il a écrit pour l'occasion :
Publicité
Mo ti ena dizan kan to ti ne
To nesans ti enn malsans pou Sagosyin
To finn fer nou trouv toukouler!
To aparisyon finn ariv dan divizyon
Disan zanfan nou later finn koule
Tablo bagar rasial tifer nou drapo nasional paret som
Me nou lindepandans reprezant enn nouvo nesans
Mo ti ena kinz zan kan to finn koumans marse
Disik ti byin sale
Somer ti pe peple kouma lapin
Zonnfrans fer nou fransi karo rant dan lizinn
Lekol dan koudvan anvole kouma fey tol
Zanfan aprann par ker komie lerwa larenn ena
Me 75 etidyan enn gran viktwar pou gayn ledikasyon gratis
Dan to sinplisite malgre siklonn ek lamizer
Zanfan ti pe zwe lamarel, sapsiway, kolin mayar, dan gran lakour ant bann lakaz
Pa ti ena miray, pa ti ena butey ni difil barble
Pa ti bizin baraz pou separ lakaz
Nou pa ti soliter, nou ti solider!
Bann vwazin ti plis ki fami ti pe partaz tou
Bred sonz, poutou, alouda, zis tou!
Ansam divan TV pou get Raj Kapoor ek Dilip Kumar
Ansam divan radio pou ekout Elvis ek Cliff
Sinema de fami, Rex, Lina Park, Mazestik zwe House full
Mo ti ena 25 an kan to ti balie karo
Enn sel lepep enn sel nasion
Nouvo lespwar lor enn sime nef
Bat lizie to trouv tou degringole divan twa
Morselman morisyin pou ras move lerb akselere
Glis to kaset dan to laparey video
Karate ek Kung fu fer ravaz
Mirak ekonomik fer to dekolaz
Lizinn CPE ranpli lamwatie servo timorisyin
Lot lamwatie pran lerwi
Lekours lekzamin ek reysit materyel desinn to lavi
Konsyans politik to lepep fer twa gayn plizyer konba
Pou protez demokrasi ek ‘welfare state’
Mo ti ena 40 an kan karo kann rekile
Spekilasyon dan tou domenn pou lanrisisman enn minorite
To bote dan boukou landrwa menase
Bann marsan larzan fleri lor lintere
To bann zanfan zot lipie depas dra
Azordi mo ena 60 an ek to ena 50.
Ena parmi to zanfan nepli dir bonzour
Zot koz ar zot portab, dan zot zorey ena irfonn
Pe bizin aprann enn nouvo langaz
Koripsion kouma karya pe fini twa
Sintetik ek sipa ki trik anpwazonn to zenes
Lor lotorout lotodeliks met paryaz
Lor rebor larout site porno, karo kaliptis ek site tol prizon anplener
To bann dirizan finn perdi lesouf
To bann elit perdi latet ar puvwar ek larzan
Dapre lord lepep ek twa ti bizin pe fet nos dor
Me to kado laniverser an platinum!
Sinbol larogans ek dekadans enn Repiblik san etik
Violans rant dan nou lakaz
Lemond dizital fer nou vinn pagla si pa pran prekosion
Liniver prizon diriz ek kontrol enn lekonomi paralel
Moutouk kominal sak zour kouma lasanser monte desann
Lor so pasaz metro expres detrir memwar, bayant to foto poskart
To laplaz pe retresi
To kopie enn model ki fer piyaz tou saki protez nou lekzistans
Apel sa devlopman!
To ena 50an mo ena 60
Pa vieyi avan to laz mo pei
To tro zoli
Reinvant leker to bann zanfan
Remet lazistis ek solidarite ant zot
Nuri zot dan karay linite
Fer zot bwar dan to robine lespwar
Kuma enn far fann to lalimyer dan losean indyin
Fer nou viv ansam, pa manti manti
Vremem ansam
Pa kouma konpot fri,
Pa kouma diferan plato fri
Me kouma enn salad fri melanze dan mem plato
Mo lamour pou twa byin for mo pei
Tou bann fler lor to later beni twa ar zot petal
Tou bann montayn lor to later rapel to listwar
Tou bann vag ki kraz lor to laplaz protez to memwar
Tou bann Morisyin dan bote to langaz sant to lespwar
Mo selebre twa mo pei!
Ehsan Abdool Rahman
Notre service WhatsApp. Vous êtes témoins d`un événement d`actualité ou d`une scène insolite? Envoyez-nous vos photos ou vidéos sur le 5 259 82 00 !
