Blog

Aranz pisinn, lerla nou aprann naze !

Premie minis dan enn deklarasion ki linn fer lindi pe dir ki li inakseptab ki boukou Morisien pa konn naze alor ki nou ti lil antoure ek delo.

Publicité

Bon, mopa pou rant dan enn debat parski pena okenn sif ofisiel ki demontre komie Morisien konne naze ek komie pa konn naze.

Me si vreman Premie minis estime ki se innakseptab ki boukou Morisien pa konn naze, li bizin koumans par pran initiativ par arranz impe pisinn dan nou ti lil.

Otan ki mo kone ena kat ou sink pisinn ki ouvert o piblik dan nou pei : Serge Alfred, Calebasses, Plaine-Verte, Pavillon, Mare d’Albert. Li inakseptab ki pena enn pisinn dign de se nom dan sak distrik dan Moris. Kitfwa si pa ti ena zwe de zil de losean indien an 1985 pisinn Serge Alfred ki trouv a Bobassin pa ti pou aranze.

Ena pou dir ki nou kave al apran naze dan la rivier ou lamer. Me eski ou trouve mazorite dimoune pou fer li si pena enn bon system sekirite ?

Bizin forme bann moniter. Bizin osi ki fer natasion fer parti program edikasion fisik dan lekol. Enn program inn lanse lindi ek sa li enn bon inisiativ.

La natasion ena boukou lefe positif lor dimoune :

1)    Li ed pou kombat istres

2)    Li ed pou gard nou an bonn sante parseki antie lekor travay kan naze

Si le Premie minis vreman anvi fer kitsoz bouzer bizin ki so gouverma koumans par donn fasilite a tou sitoyen pou ki zot kave pratik la natasion. Boukou dimoune kwar a rezon ou a tor ki bann pisinn ti pe zis frekente par ban gran palto longtan parseki ena enn perseption ki tou dimoun pa ti ena mwayen pou met lipie dan enn pisinn. Me nou en 2017 zordi. Bizin ki nou bann dirizan politik ran aktivite sportiv ala porte tou dimoune ki li res dan villaz ou dan lavil.

Se a sa moman la ki nou pou gann enn popilasion ki ena kiltir sportiv. Sinon nou pou rest zis asiz divan nou televizion pou get spor.

Se pa enn blag, me nou extra en retar en matier infrastriktir sportiv dan nou ti zil. Mo panse ki bann desider politik bizin fer zefor lor sa kote la pou arranz impe plis complex sportif. Sa pou ed la popilasion trouv bann lendrwa kot zot kav pratik impe spor. Sinon diabet ek obesite pou kontinie rwine boukou dimoun ek ladrog ek lalkol pou kontinie detrir nou la zenes. Ran sport aksesib a tou dimoun ! 

Me pou ki arriv sa stad la, bizin pass a laksion. Li inakseptab si nou ban dirizan zis koze san fer kitsoz bouze. Li ankor pli inakseptab si nou dirizan nek dir ban parol anler ek popilasion kontinie manz pistas get sinema !

Piksidou

 

Notre service WhatsApp. Vous êtes témoins d`un événement d`actualité ou d`une scène insolite? Envoyez-nous vos photos ou vidéos sur le 5 259 82 00 !